Milli Qəhrəmanımız Məzahir Rüstəmovun (1960-1992) sabah doğum günüdür.

Ailəsini aldadaraq Qarabağ döyüşlərinə könüllü gedən, ermənilərlə təkbətək döyüşə girən, son qumbarası ilə özünü və dığaları partladan Milli Qəhrəmanımız Məzahir Rüstəmovun (1960-1992) sabah doğum günüdür. Ermənilərin hərbi birləşmələri 1992-ci il avqustun 5-də Gədəbəyin Mutudərə kəndini ələ keçirmək üçün qəfil hücuma keçdilər. Ermənilər bu istiqamətdə minə yaxın canlı qüvvə, 4 tank, 14 zirehli maşın və digər texnika yeritmişdilər. İlk zərbəni baş leytenant Məzahir Rüstəmovun dəstəsi öz üzərinə götürüb. Məzahir cəsur döyüşçüləri ilə kəndin müdafiəsinə qalxır. Onlar dinc əhalinin kənddən çıxmasına şərait yaradırlar. Məzahir son nəfəsinə qədər döyüşür, ümid etdiyi əlavə kömək isə gəlib çatmır. Məzahir Rüstəmov qəhrəmancasına həlak olur; düşmən əlinə diri düşməsin deyə, axırıncı qumbarası ilə özünü və dığaları partladır. Son nəfəsinəcən vuruşan komandir Gədəbəyin Şınıx bölgəsində böyük faciənin qarşısını ala bilir. Polkovnik Cahangir Rüstəmovun başçılığı ilə döyüşçülərimiz hücuma keçərək avqustun 8-də Mutudərəni və Başkəndi erməni işğalçılarından təmizləyiblər.