Akademik Milli Dram Teatrının aktrisası, əməkdar artist Sevil Xəlilovanın ad günüdür.

Sevil Rza qızı Xəlilova Bakıda anadan olub. C.Cabbarlı adına “Azərbaycanfilm” kinostudiyası nəzdindəki “kino aktyoru” kursunun axşam şöbəsində (1969-1970), M.Əliyev adına Azərbaycan Dövlət İncəsənət İnstitutunun “dram və kino aktyorluğu” fakültəsində təhsil alıb (1970-1974, Adil İsgəndərovun kursu). Tələbə ikən, 1973-cü ildə Akademik Milli Dram Teatrında rejissor Həsənağa Salayevin dəvəti ilə Nazim Hikmətin “Şöhrət və ya unudulan adam” psixoloji dramında professorun qızı rolunu ifa edib. 1974-cü ildən ömrünün sonuna qədər Akademik Milli Dram Teatrında çalışıb. Tacikistan istehsalı olan “Nisso. Gəncliyin ilk səhəri” (1979, rejissor Dövlətnəzər Xudonəzərov, 3 seriyalı) filmində çəkilib. Naxçıvan Muxtar Respublikasının Əməkdar artisti (1986), Əməkdar artist (2002) Sevil Xəlilova 2011-ci ildə vəfat edib.

Filmoqrafiya:

Laçın yuvası (1975, tammetrajlı film-tamaşa) – aktrisa (Pəricahan)

Mehmanxana sahibəsi (1978, tammetrajlı film-tamaşa) – aktrisa (Dilnira)

Ötən ilin son gecəsi (1978, tammetrajlı film-tamaşa) – aktrisa (Gülarə)

Kişilər (1979, tammetrajlı film-tamaşa) – aktrisa (Səlimə)

Yollar görüşəndə... (1979, qısametrajlı film-tamaşa) – aktrisa (Rahidə)

Atayevlər ailəsi (1980, tammetrajlı film-tamaşa) – aktrisa (Mehrican)

Yad qızı (1990, tammetrajlı film-tamaşa) – aktrisa (Naciyə)

Güllələnmiş heykəllər (2002, tammetrajlı film-tamaşa) – aktrisa (Gövhər ağa)

Biz qayıdacağıq (2007, tammetrajlı bədii film) – aktrisa (qaçqın qadın)

Kinli, xəsis, səfeh (2008, qısametrajlı bədii film) – aktrisa (ana)

Aliyyə (????, tammetrajlı film-tamaşa) – aktrisa (özbək qızı)