Ənvər Fərəcov 28 iyun 1952-ci ildə Goranboy rayonunun Sarov kəndində doğulub. 1968-ci ildə Sarov kənd orta məktəbini bitirib. Sonra Azərbaycan Kənd Təsərrüfatı İnstitutuna daxil olub. 1974-cü ildə mexanikləşdirmə fakültəsini bitirib və Goranboy rayonunun "Azərbaycan" kolxozunda baş mühəndis vəzifəsində əmək fəaliyyətinə başlayıb. 1981-ci ildən həyatını daxili işlər orqanları ilə bağlayıb. 1990-cı ildə Özbəkistan Ali Milis Məktəbini bitirərək Azərbaycan Respublikasının Daxili İşlər Nazirliyinin sərəncamına göndərilib.
18 avqust 1991-ci il Ənvər Fərəcov yoldaşlarını mühasirədən çıxartmaq üçün qeyri-bərabər döyüşə girib. Ermənilərin mühasirəsini yararaq polis əməkdaşlarını itkisiz azad ediblər. Bu əməliyyata görə bölmə rəisi DİN tərəfindən mükafatlandırılıb.
14 sentyabr 1991-ci ildə yağı düşmən böyük qüvvə ilə Goranboy rayonunun Erkəç, Mənəşli, Buzluq kəndlərinə hücuma keçib. Bu, Ənvər Fərəcovun son döyüşü olub. O, bu döyüşdə qəhrəmancasına həlak olub.
Goranboy rayonunun Sarov kəndində dəfn edilib, şəhərdə büstü qoyulub.
Azərbaycan Respublikası Prezidentinin 1992-ci il 8 oktyabr tarixli 214 saylı Fərmanı ilə Fərəcov Ənvər Səyyad oğluna ölümündən sonra “Azərbaycanın Milli Qəhrəmanı” adına layiq görülüb.
Milli Qəhrəman haqqında Zamin Məmmədov “Vətənə dönənim” adlı film çəkib. Film 2016-cı ildə Nizami Kino Mərkəzində nümayiş olunub.
Hiç yorum yok:
Yorum Gönder