İcra başçısının qəbulunda məmura kəllə atan şəxs həbs edildi

Neftçala Rayon İcra Hakimiyyətinin başçısı Mirhəsən Seyidovun qəbulunda məmura kəllə ilə zərbə vuran şəxsə hökm oxunub. 

 

Qaynarinfo-nun məlumatına görə, hadisə 21 iyun 2023-cü ildə Neftçala rayonu, Bankə qəsəbəsi, S.Vurğun adına 2 saylı tam orta məktəbin akt zalında baş verib. 

 

Belə ki, həmin gün Neftçala Rayon İcra Hakimiyyəti başçısının qəsəbə sakinləri ilə səyyar görüşü keçirilib. Görüş zamanı 1976-cı il Bankə qəsəbə sakini Zaur bacısı oğlu ilə birlikdə içkili halda akt zalına daxil olaraq, maddi təminatının aşağı olmasını əsas gətirməklə onlara iş verilməsini istəyiblər. Məlumata görə, görüşdə Mirhəsən Seyidov Zauru və bacısı oğlunu etik qaydalara riayət etməyə çağırıb, şikayətləri ilə maraqlanıb və imkanı daxilində onlara köməklik göstərəcəyini bildirib. 

Lakin Zaur icra başçısının sözünü kəsib, yenidən səs-küy salmağa başlayıb. Neftçala rayonu, Bankə qəsəbə inzibati ərazi dairəsi üzrə nümayəndəsi Tarel Nağıyev yaxınlaşaraq onu sakitləşdirmək istəyib. Lakin təqsirləndirilən şəxs üzərindən bıçaq çıxararaq, onu hədələməyə başlayıb. Eyni vaxtda mübahisə zəminində Zaur başla Tarelin burnuna zərbə vurub. Zaurun və bacısı oğlunun hərəkətləri nəticəsində tədbirin gedişi təxminən 25-30 dəqiqə ərzində pozulub. Bu vaxt icra hakimiyyətinin əməkdaşları həmin şəxsləri zaldan kənarlaşdırıblar. 

Tarel Nağıyev

 

Zaur saxlanılaraq barəsində Cinayət Məcəlləsinin 221.2.2 və 228.4-cü maddələri ilə cinayət işi açılıb və iş baxılması üçün məhkəməyə göndərilib. Təqsirləndirilən şəxs məhkəmədə işlə təmin olunması tələbi ilə dəfələrlə Neftçala Rayon İcra Hakimiyyəti başçısının Neftçala rayonu, Bankə qəsəbə inzibati ərazi dairəsi üzrə nümayəndəsinə müraciət etdiyini, lakin heç bir işlə təmin olunmadığını bildirib. İşlə təmin olunması üçün bacısı oğlunu da götürərək icra başçsı ilə görüşün keçirildiyi yerə gedib. Lakin orada başçıya müraciət etmək istədikdə icra hakimiyyətinin əməkdaşları onu zaldan çıxarmaq istəyiblər. Bu zəmində mübahisə yaranıb və özündə saxladığı və meyvə soymaq üçün istifadə etdiyi bıçaq cibindən yerə düşüb. O, həmçinin Tarelin burnuna qəsdən zərbə vurduğunu etiraf edib. 

 

Məhkəmənin hökmü ilə Zaur Cinayət Məcəlləsinin 221.2.2-ci maddəsi ilə təqsirli bilinərək 1 il müddətinə azadlıqdan məhrum etmə cəzasına məhkum edilib. O, cəzasını 1 may 2024-cü ildən ümumi rejimli cəzaçəkmə müəssisəsində çəkəcək.
 

Qeyd edək ki, həmin tədbirdən sonra KİV-də Neftçalanın Bankə qəsəbəsində səyyar görüş zamanı vətəndaşlarla icra başçısı arasında insident baş verməsi haqda məlumatlar yayılmışdı. Hətta Mirhəsən Seyidovun döyülməsi ilə bağlı iddialar da səslənirdi. Lakin RİH-dən bildirilmişdi ki, sosial şəbəkələrdə icra başçısı ilə bağlı yayılan məlumatlar həqiqəti əks etdirmir.