Son illərdə tikinti şirkətlərinin inşa etdiyi binaların keyfiyyətindən müxtəlif səpkili şikayətlərə rast gəlmək olar. Payçıları xüsusən narahat edən tikilən binaların beton keyfiyyəti, zəlzələyə davamlılığının olmasıdır. Habelə, MTK-lar mənzillərin kvadratmetrində insanları aldadır, onların hüquqlarını pozur. Hətta bu günlərdə məlum olmuşdu ki, o şirkətlərdən biri – “Kristal Abşeron”ın binası əyilib. Söhbət bu qədər reklam edilən “Qobu Park” layihəsindən gedir. Təsəvvür edin ki, müasir dönəmdə şirkət bina tikir, o da əyilir. Bundan başqa, “Park Yasamal” layihəsinə aid sosial şəbəkədə vətəndaşlar bəzi iddialar səsləndirmişdi. Maraqlıdır, nə üçün tikinti şirkətləri ilə bağlı konkret addımlar atılmır? Bu gün dövlət qurumları tərəfindən onların işinə nəzarət mexanizmi lazımı səviyyədə qurulubmu? Bu mövzuda Tribunainfo.az-a danışan Prezidentliyə namizəd Fuad Əliyev qeyd edib ki, ümumiyyətlə, onun seçki platformasında göydələn tikintisi ilə bağlı konkret təkliflər var: “Mən İctimai Televiziyada çıxışlarımda, mətbuata müsahibələrimdə açıqlamışam ki, Bakıda və bölgələrdə 7 mərtəbədən artıq bina tikilməsinə icazə verilməməlidir. Bildirmişəm ki, bu barədə dövlətin sərt qərarı və nəzarəti olmalıdır. Çünki həm təhlükəsizlik, həm zəlzələyə dözümlülük cəhətdən vacibdir. Sovet dövründə maksimum 9 mərtəbəli binalar tikilib, uşaqlar üçün istirahət yerindən tutmuş qarajlara qədər təmin olunub. Hazırda 19-20 mərtəbəli binalar tikən şirkətlər avtopark üçün normal yer saxlamır, sıxlıq olur, üstəlik, zəlzələyə dözümlülüklə bağlı insanlarda ciddi narahatlıq və təşviş var. Ona görə də təklif edirəm ki, 7 mərtəbədən hündür bina tikilməsi qadağan olunmalıdır. Üstəlik, mənzillərin bölgüsü, keyfiyyətli beton işi və digər məsələlərdə heç də şirkətlər tikinti normalarına həmişə əməl etmirlər. O baxımdan “Kristal Abşeron” şirkəti üçün də bu məsələ keçərli ola bilər. Elə şirkətin “Qobu Park” layihəsi haqda verilən məlumat göstərdi ki, düzgün iş aparılmayıb”. Prezidentliyə namizəd bildirib ki, mətbuatda, sosial şəbəkələrdə “Kristal Abşeron” və eləcə də başqa tikinti firmaları barəsində şikayətlərə rast gəlmək mümkündür: “Biz vətəndaşların müraciət və şikayətlərini izləyirik, qeydə alırıq. Onların sosial problemlərini aidiyyatı qurumlar qarşısında qaldırırıq. Bilirsiniz ki, mən “Müstəqil Həmkarlar” İctimai Birliyini təsis edənlərdən biriyəm və komandamız vətəndaşların müxtəlif sosial problem, şikayətlərini araşdırır, müraciətləri yoxlayıb qurumlara yönəldirik ki, insanların şikayətinə baxılsın. Bu mənada “Kristal Abşeron”dan edilən şikayətlər, mətbuatda gedən xəbərlər barəsində bizim ictimai birlik tərəfindən araşdırmalar aparılması mümkündür. Həmçinin, bizim “qaynar xətt” var və hər bir vətəndaşımız hansı məsələdə narazıdırsa, zəng açaraq müraciət edə bilər. Misal üçün “Kristal Abşeron”dan şikayət edənlərdən biri mətbuata demişdi ki, “Qobu Park”da binanın üstü keyfiyyətsiz təmir edildiyindən nəmişlik olur, nəticədə mənzildəki divarlar kif bağlayır. Yəni bu narazılıqlar varsa, deməli, tədbir görülməlidir ki, sakinlər şikayət etməsinlər. Onlar pulu nəmişlik, kif üçün verməyib”. Fuad Əliyev hesab edir ki, bütövlükdə hər bir tikinti şirkəti işini vicdanlı görməlidir: “Əvvəla, qanunlara, tikinti normalarına əməl etmək onların borcudur. İkincisi, nəzərə almalıdırlar ki, insanlar əziyyətlə, kreditlə, çətinliklə mənzil alır, ev sahibi olanda sevinirlər, amma onlara keyfiyyətsiz mənzillər satılanda ortaya belə problemlər, ziddiyyətli məsələlər çıxır”. Nigar

Azərbaycan Respublikasının Prezidenti İlham Əliyev Türkiyə Respublikasının Prezidenti Rəcəb Tayyib Ərdoğana başsağlığı məktubu ünvanlayıb. 

President.az xəbər verir ki, məktubda deyilir:

“2023-cü ilin fevralında Türkiyədə baş vermiş və on minlərlə insanın həyatına son qoymuş dəhşətli zəlzələlərdən bir il ötür. Bu faciə nəticəsində həlak olmuş bacı-qardaşlarımızın əziz xatirəsini dərin hörmət və ehtiramla yad edir, onlara uca Allahdan rəhmət, doğmalarına və yaxınlarına səbir diləyirəm.

Bu fəlakət Türkiyəni olduğu kimi Azərbaycanı da dərindən sarsıtdı. Xalqımız həmin ağır günlərdə qardaş Türkiyə xalqı ilə bir ürək olaraq, faciənin ağrı-acısını bölüşdü, sonsuz kədərini birlikdə yaşadı. Zəlzələ xəbərinin ilk dəqiqələrindən heç bir yardım çağırışını gözləmədən Azərbaycan xalqı və dövləti öz qardaşlıq borcunu yerinə yetirmək üçün bütün imkanlarını səfərbər etdi. Baş vermiş güclü zəlzələnin fəsadlarının aradan qaldırılması işlərinə və axtarış-xilasetmə əməliyyatlarına cəlb olunmuş xilasedicilərimiz, həkimlərimiz və könüllülərimiz türkiyəli həmkarları ilə çiyin-çiyinə böyük cəsarətlə, əzmlə və fədakarlıqla fəaliyyət göstərdi. Dövlət və özəl qurumlarla yanaşı kiçikdən böyüyə hər bir soydaşımız zəlzələ qurbanlarına dəstək və mənəvi dayaq olmaq üçün əlindən gələni əsirgəmədi.

Sizin qətiyyətli rəhbərliyiniz altında Türkiyə Hökuməti zəlzələnin səbəb olduğu irimiqyaslı dağıntıların aradan qaldırılması, zərər çəkmiş bölgənin dirçəldilməsi, evsiz qalan milyonlarla insanın evlə təmin edilməsi üçün var qüvvəsi ilə çalışır. Azərbaycan da hazırda Kahramanmaraş vilayətində humanitar fəaliyyətini davam etdirərək burada aparılan yenidənqurma və bərpa işlərində, sosial obyektlərin inşasında yaxından iştirak edir. Biz bu nəcib və şərəfli missiyada Türkiyənin yanında olmağımızdan böyük qürur duyuruq.

Bütün bunlar Azərbaycan-Türkiyə sarsılmaz birliyinin və həmrəyliyinin növbəti təzahürü olaraq qardaşlıq salnaməmizə əbədi olaraq həkk olundu. Türkiyə yaxşı gündə və hüznlü gündə Azərbaycanın yanında olduğu kimi biz də daim Türkiyənin yanındayıq və bundan sonra da olacağıq. Çünki biz bir millət, iki dövlətik.

Əminəm ki, Sizin liderliyiniz, Türkiyə xalqının mübarizə əzmi, həmrəylik ruhu və mətin iradəsi sayəsində qüdrətli Türkiyə dövləti bu çətinliklərin də öhdəsindən tez bir zamanda gələcək, bu acı sınaqdan şərəflə və daha da güclənmiş çıxacaqdır.

Bu hüznlü gündə bir daha Türkiyənin kədərinə şərik olduğumuzu bildirir, Sizə, həlak olanların ailələrinə və yaxınlarına, qardaş Türkiyə xalqına öz adımdan və Azərbaycan xalqı adından başsağlığı verirəm”.