Yaşasaydı bu gün 49 yaşını qeyd edəcəkdi.

Bu misraları aramızdan vaxtsız ayrılan möhtərəm Hacı Şahin Həsənliyə ithaf edirəm. Yaşasaydı bu gün 49 yaşını qeyd edəcəkdi. Allah ailəsinə və sevənlərinə səbir versin.

Gəldi bu məmləkətə nitqi bəlağətli biri

Ehtiram sahibi, izzətli, şərafətli biri

Günbəgün hamını məst etdi o aram danışıq

Toplumun ruhuna yol tapdı nəzakətli biri

Üzünün nuru sevindirdi qərib kimsələri

Üzdə məsumlar evi, sözdə cəsarətli biri

Canı söz verdiyitək canü-könüldən bir gün

Ən yaxın Dostuna tapşırdı sədaqətli biri

Çox yetim bir də yetim qaldı onun getdiyi gün

Var imiş sən demə gizlində səxavətli biri

Ey ədalətliləri məhkum edənlər məhvə

Sizdən hesab soracaq sonda ədalətli Biri

Getdi bu məmləkətə gəlmiş o qiymətli biri

Ehtiram sahibi, izzətli, şərafətli biri