Tanışını qətlə yetirməkdə ittiham olunan meyxanaçı Rəşad Dağlının (Əmirov) məhkəmədə verdiyi ifadəsinin yeni təfərrüatı məlum olub.
Bizim.Media-nın əldə etdiyi məlumata görə, Rəşad Dağlı məhkəmədə çıxışı zamanı barəsində həbslə bağlı olmayan cəza seçilməsini xahiş edib.
O bildirib ki, barəsində ev dustaqlığı, polis nəzarəti altına verilmə və ya başqa yerə getməmək barədə qətimkan tədbiri seçilərsə, istintaqdan yayınmayacaq.
Müdafiə tərəfi də hazırkı şəraitdə həbs qətimkan tədbirinin seçilməsinə hər hansı zərurət olmadığını vurğulayıb. Lakin məhkəmə R.Dağlının xahişini nəzərə almayıb.
Qeyd edək ki, bu məhkəmə prosesi noyabrın 10-da Qaradağ Rayon Məhkəməsində keçirilib. Hakim Teymur Quliyevin sədrliyi ilə baş tutan iclasda Rəşad Dağlının barəsində 4 ay müddətinə həbs qətimkan tədbiri seçilib.
Noyabrın 10-da yayılan ifadədə Rəşad Dağlı bildirib ki, hadisə zamanı qətl törətmək fikrində olmayıb. Onun sözlərinə görə, hadisə vaxtı bıçaq İskəndər Mehtiyevdə olub və onu öldürməyə cəhd edib. Rəşad Dağlı deyib ki, əlbəyaxa zamanı həmin bıçağı ondan alıb və İskəndər Mehtiyevi qətlə yetirib.
İttihama görə, noyabrın 9-da saat 05:00 radələrində 1979-cu il təvəllüdlü İskəndər Mehtiyevin öldürülməsi barədə rayon prokurorluğuna məlumat daxil olub.
Aparılmış araşdırmalarla zərərçəkmişin tanışı, 1984-cü il təvəllüdlü Rəşad Əmirovun şəxsi münasibətlər zəminində aralarında yaranmış münaqişə zamanı bıçaqla çoxsaylı xəsarətlər yetirərək İskəndər Mehtiyevi qəsdən öldürməsinə əsaslı şübhələr müəyyən edilib.
Faktla bağlı Qaradağ Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. Rəşad Əmirov şübhəli şəxs qismində tutularaq istintaqa cəlb edilib.
Rəşad Dağlının qətlə yetirdiyi şəxslə bağlı bəzi məqamlar üzə çıxıb. Meyxanaçının bıçaqladığı 1979-cu il təvəllüdlü İskəndər Mehtiyev xeyli vaxt həbsxanada olub. Hadisəyə isə İskəndərin Rəşad Dağlının arxasınca söyüş söyməsi səbəb olub.
Belə ki, Rəşad Dağlı İskəndərlə məsələyə aydınlıq gətirmək üçün onu görüşə çağırıb. Noyabrın 9-da səhər saatlarında onlar Lökbatan qəsəbəsində görüşüblər.
Şəxsi münasibətlər zəminində baş vermiş münaqişə zamanı Rəşad Dağlı İskəndəri bıçaqlayaraq öldürüb.
Qeyd edək ki, Rəşad Dağlının qətlə yetirdiyi İskəndər Mehtiyev Cinayət Məcəlləsinin 234.4.3 (külli miqdarda narkotik vasitələrin qanunsuz dövriyyəsi) maddəsi ilə uzun müddət həbsdə olub.
O, təxminən hadisədən 15 gün əvvəl cəzasını başa vuraraq azadlığa buraxılıb.
İskəndər Mehtiyev azadlığa buraxıldıqdan sonra dəfələrlə Rəşad Dağlıya zəng vuraraq onunla mübahisə edib.
Hiç yorum yok:
Yorum Gönder